RC.AYOUB AWAPONGEZA WAANDAAJI WA MBIO ZA BASKELI ZA AFRIKA MASHARIKI - Karafuu24 Blog

Breaking

Sunday, 15 April 2018

RC.AYOUB AWAPONGEZA WAANDAAJI WA MBIO ZA BASKELI ZA AFRIKA MASHARIKI

Mkuu wa mkoa wa Mjini Magharibi Unguja Mheshimiwa Ayoub Mohammed Mahmoud amewapongeza waandaaji na mbio za baskeli za Afrika Mashariki kwa kuamua kuanzisha mbio hizo zenye lengo la kuhamasisha amani na utalii katika ukanda wa Afrika Mashariki, Kati na Kusini.
Akihutubia wananchi na washiriki wa mbio hizo katika uwanja wa Amaan mjini Zanzibar, Mheshimiwa Ayoub amesema mbio hizo zinakusudia kushawishi na kuwakumbusha wananchi juu ya umuhimu wa kulinda amani iliyopo pamoja na kushawishi uhifadhi wa mazingira kwa lengo la kuimarisha utalii wa ndani wa Zanzibar na Tanzania bara.

Amewataka washiriki hao wanaotoka katika nchi mbali mbali za ukanda wa Afrika Mashariki, Kati na Kusini kutumia muda mchache watakaokuwepo Zanzibar kupitia vivutio vya utalii vilivyopo na kwenda kuvitangaza katika nchi zao sambamba na kuelezea hali ya amani iliyopo nchini.
Aidha aliishukuru wizara ya Habari, Utamaduni na Mambo ya Kale kwa kuamua kushirikiana na taasisi ya Afrika Mashariki Festival kwa kuamua kuanzisha mbio hizo ndani ya mkoa wa Mjini Magharibi mbio ambazo zinatarajiwa kufanyika pia katika mkoa wa Dar es salam ambazo amesema zitasaidia kukuza uwekezaji katika sekta mbali mbali ikiwemo ya utalii.

Mapema akitoa taarifa za mbio hizo katibu mtendaji wa kamisheni ya utalii Zanzibar Dkt. Vuai Idi Lila amezitaja nchi zilizotoa washiriki wa mbio hizo kuwa Tanzania bara, Kenya, Uganda, Rwanda, Burundi, Ethiopia, afrika kusini na wenyeji Zanzibar.
Amesema mbio hizo ni sehemu ya mikakati ya kamisheni yake ya kuimarisha utalii nchini katika majira yote kama moja ya azma ya serikali ya mapinduzi Zanzibar pamoja na kukuza uhusiano na wadau wengine wa utalii nchini.
Jumla ya washiriki 72 wakiwemo wanawake wawili kutoka nchini Kenya walishiriki mbio hizo za umbali wa kilomita 60 zilizoanzia katika uwanja wa amaan kupitia Welezo, Mwera, Dunga, Jendele, Unguja Ukuu, Bungi, Tunguu na kurudia  njia ya Mwera hadi uwanja wa Amaan.

NA MZEE GEORGE

No comments:

Post a Comment